ಪವರ್ ಫುಲ್ ಅನ್ನೋ ಮಾತಿಗೆ ಹೇಳಿಮಾಡಿಸಿದಂತೆ ರೂಪುಗೊಂಡಿದ್ದ ಸಿನಿಮಾ ಟಗರು. ಶಿವಣ್ಣ ಎಂಬ ಸೂಪರ್ ಎನರ್ಜಿ ಜೊತೆಗೆ ಧನಂಜಯ ಮತ್ತು ವಸಿಷ್ಠ ಎನ್ನುವ ಶಕ್ತಿಶಾಲಿ ನಟರನ್ನು ಒಂದು ಸೇರಿಸಿದ್ದ ಚಿತ್ರವದು. ಆ ತನಕ ಧನಂಜಯ ಮತ್ತು ವಸಿಷ್ಠ ಇಬ್ಬರಿಗೂ ಇದ್ದ ಇಮೇಜನ್ನೇ ಬದಲಿಸಿತ್ತು ಟಗರು. ಹೀರೋ ಆಗಿ ನೆಲೆ ನಿಲ್ಲುತ್ತಿದ್ದ ಧನಂಜಯ ಅವರಿಗೆ ಡಾಲಿ ಎನ್ನುವ ಅಡ್ಡ ಹೆಸರನ್ನೂ ಕೊಟ್ಟಿದ್ದರೊಂದಿಗೆ ವಿಲನ್ ಪಾತ್ರದಲ್ಲಿ ಅಬ್ಬರಿಸುವಂತೆ ಮಾಡಿತ್ತು.
ಅದ್ಭುತ ಪ್ರತಿಭೆಯಿದ್ದರೂ ಆ ತನಕ ದೊಡ್ಡ ಮಟ್ಟದ ಗೆಲುವಿಗಾಗಿ ಹಂಬಲಿಸುತ್ತಿದ್ದವರು ವಸಿಷ್ಠ. ಇವರ ಪಾಲಿಗೆ ಚಿಟ್ಟೆ ಅಂತಾ ಹೆಸರನ್ನು ಕರುಣಿಸಿದ್ದು ಮಾತ್ರವಲ್ಲ, ಬಯಸಿದ್ದನ್ನೆಲ್ಲಾ ಕೊಡುವ ಕಾಮಧೇನುವಾಯಿತು ಟಗರು. ಅಪ್ಪಟ ಕನ್ನಡದ ಈ ಎರಡು ಪ್ರತಿಭೆಗಳನ್ನು ಕರ್ನಾಟಕದ ಗಡಿ ದಾಟಿಸಿ ಇಂಡಿಯಾದ ಇತರೆ ಭಾಷೆಗಳಿಗೂ ಕಳಿಸಿಕೊಟ್ಟಿದ್ದು ಕೂಡಾ ಟಗರು ಅಂತಾ ಕರೆಸಿಕೊಂಡ ಅದೊಂದು ಸಿನಿಮಾ. ಖಳನಟರಾಗಿ ಕಾಣಿಸಿಕೊಂಡರೂ ಸ್ಟಾರ್ ವರ್ಚಸ್ಸು ಪಡೆದ ಈ ಇಬ್ಬರೂ ಈಗ ಮತ್ತೆ ಶಿವಣ್ಣನ ಜೊತೆ ಸೇರಿದ್ದಾರೆ.
ಎಲ್ಲರಿಗೂ ಗೊತ್ತಿರುವಂತೆ ಡಾಲಿ ಶಿವಣ್ಣನ ಬೈರಾಗಿ ಸಿನಿಮಾದಲ್ಲಿ ಪ್ರಮುಖ ಪಾತ್ರದಲ್ಲಿ ಕಾಣಿಸಿಕೊಳ್ಳುತ್ತಿದ್ದಾರೆ. ಈ ಹಿಟ್ ಕಾಂಬಿನೇಷನ್ ಜೊತೆ ಚಿಟ್ಟೆ ಕೂಡಾ ಸೇರಿಕೊಳ್ಳಲಿ ಅನ್ನೋದು ಬಹುಶಃ ಚಿತ್ರತಂಡದ ನಿರ್ಧಾರವಾಗಿತ್ತೇನೋ. ಹೀಗಾಗಿ ತೆರೆ ಮೇಲೆ ಕಾಣಿಸಿಕೊಳ್ಳದಿದ್ದರೂ ಪರವಾಗಿಲ್ಲ ಅದ್ಭುತ ಕಂಠದ ಚಿಟ್ಟೆಗೆ ಬೈರಾಗಿಯ ಒಂದು ಹಾಡಿಗೆ ದನಿಯಾಗವ ಅವಕಾಶ ಮಾಡಿಕೊಟ್ಟಿದ್ದಾರೆ. ಈ ಮೂಲಕ ಟಗರು ಚಿತ್ರದ ಸೂಪರ್ ಹಿಟ್ ಕಾಂಬೋ ಬೈರಾಗಿಯ ಭಾಗವಾಗಿದೆ. ಬೈರಾಗಿ ಹಾಡಿಗೆ ವಸಿಷ್ಠ ಸಿಂಹ ಗಾಯನ
ಈಗಾಗಲೇ ಬಿಡುಗಡೆಯಾಗಿ ಜನಮೆಚ್ಚುಗೆ ಪಡೆದಿರುವ ರಿದಮ್ ಆಫ್ ಶಿವಪ್ಪ ಹಾಡಿಗೆ ಶಿವಣ್ಣನ ಜೊತೆ ನಟ ಶರಣ್ ಕೂಡಾ ದನಿ ಸೇರಿಸಿದ್ದರು. ಈಗ ವಸಿಷ್ಠ ಹಾಡಿರುವ ಪವರ್ ಫುಲ್ ಹಾಡು ಇಷ್ಟರಲ್ಲೇ ರಿಲೀಸಾಗಲಿದೆ. ಮೋಡಿ ವಿದ್ಯೆಯ ಮಹಾಗುರು ಅನೂಪ್ ಸಿಳೀನ್ ನೀಡಿರುವ ಸಂಗೀತದ ಈ ಹಾಡಿನಲ್ಲಿ ಚಿಟ್ಟೆ ಜೊತೆ ಕೆ.ಜಿ.ಎಫ್ ಖ್ಯಾತಿಯ ಅನನ್ಯಾ ಭಟ್ ಕೂಡಾ ಸಾಥ್ ನೀಡಿದ್ದಾರೆ…!
ಜುಲೈ ಒಂದನೇ ತಾರೀಖು ತೆರೆಗೆ ಬರುತ್ತಿರುವ ಬೈರಾಗಿ ಇಂಥಾ ಹತ್ತು ಹಲವು ವಿಶೇಷಗಳನ್ನು ಹೊತ್ತು ಬರುತ್ತಿದೆ….!
