ನಟ ಶರಣ್ ಬಿಡುಗಡೆ ಗೊಳಿಸಿದ್ದ “ನೈಂಟಿ ಬಿಡಿ ಮನೀಗ್ ನಡಿ” ಚಿತ್ರದ ಟೀಸರ್ ಸಖತ್ ಸದ್ದು ಮಾಡುತ್ತಿದೆ! ಹಿರಿಯ ನಟ ‘ಬಿರದಾರ್ ಹೊಸ ಅವತಾರ’ದಲ್ಲಿ ಕಾಣಿಸಿಕೊಂಡು ಕಲರ್ ಫುಲ್ ಆಗಿ ಮಿಂಚಿರುವ ಚಿತ್ರದ ಟೀಸರಿಗೆ ಅತಿಕಡಿಮೆ ಅವಧಿಯಲ್ಲಿ ಲಕ್ಷ ದಾಟಿದ ವೀಕ್ಷಣೆ ಕಂಡು ಸೌಂಡು ಮಾಡತೊಡಗಿದೆ.
‘ಅಂತರಾಷ್ಟ್ರೀಯ ಪ್ರಶಸ್ತಿ ವಿಜೇತ ಬಿರಾದಾರರ ಐನೂರ’ನೇ ಚಿತ್ರ ಇದಾಗಿದ್ದು, ಕಾಮಿಡಿಯ ಜೊತೆ ಕ್ರೈಂ ಥ್ರಿಲ್ಲರ್ ಕಥಾ ಹಂದರ ಹೊಂದಿದ್ದು, ಚಿತ್ರ ನಿರೀಕ್ಷೆ ಮೂಡಿಸುತ್ತಿದೆ. ‘ಅಮ್ಮಾ ಟಾಕೀಸ್ ಬಾಗಲಕೋಟೆ’ ಸಂಸ್ಥೆಯ ಈ ಚಿತ್ರಕ್ಕೆ ಉಮೇಶ್ ಬಾದರದಿನ್ನಿ ಮತ್ತು ನಾಗರಾಜ್ ಅರೆಹೊಳೆ ಜಂಟಿ ನಿರ್ದೇಶನ ಮಾಡಿದ್ದು, ಚಿತ್ರ ಬಿಡುಗಡೆಗೆ ತಯಾರಾಗುತ್ತಿದೆ.
ಬಿಡುಗಡೆಯ ಮೊದಲ ಹೆಜ್ಜೆಯಾಗಿ ಟೀಸರ್ ಬಿಟ್ಟುಕೊಂಡಿದ್ದು, ಪ್ರೇಕ್ಷಕರ ರೆಸ್ಪಾನ್ಸ್ ಕಂಡು ಫುಲ್ಖುಷ್ ಆಗುವುದರ ಜೊತೆಗೆ, ಬಿರಾದಾರ್ ಮೇಲೆ ನಂಬಿಕೆ ಇಟ್ಟು ಹಣ ಸುರಿದ ನಿರ್ಮಾಪಕರು ನಿರಾಳವಾಗಿದ್ದಾರೆ ಎನ್ನಬಹುದು! ಹಾಗೆಯೇ ಹಾಡುಗಳು ಬಿಡುಗಡೆಗೆ ಸಜ್ಜಾಗುತ್ತಿದ್ದು, ಉತ್ತರ ಕರ್ನಾಟಕ ಶೈಲಿಯ ‘ಜವಾರಿ’ ಹಾಡೊಂದರಲ್ಲಿ ಎಪ್ಪತ್ತರ ವಯಸ್ಸಿನ ಬಿರಾದಾರ್ ಸಖತ್ ಸ್ಟೆಪ್ಸ್ ಹಾಕಿದ್ದು, ಪ್ರೇಕ್ಷಕರಿಂದ ಇವರ ಡಾನ್ಸ್ ಎನರ್ಜಿಗೆ ‘ಫುಲ್ ಮಾರ್ಕ್ಸ್’ ಸಿಗೋದು ಪಕ್ಕಾ ಅನ್ನೋದು ಚಿತ್ರತಂಡದ ನಂಬಿಕೆ.
