ಈ ವರ್ಷದ ಆರಂಭದಲ್ಲೇ ‘ಗತವೈಭವ’ ಎಂಬ ಚಿತ್ರವನ್ನು ಘೋಷಿಸಿದ್ದರು ನಿರ್ದೇಶಕ ಸಿಂಪಲ್ ಸುನಿ. ಒಂದು ಪತ್ರಿಕಾಗೋಷ್ಠಿ ಮಾಡಿ ನಾಯಕನ ಪರಿಚಯದ ವೀಡಿಯೋ ಸಹ ಬಿಡುಗಡೆ ಮಾಡಿದ್ದರು. ಆ ನಂತರ ಚಿತ್ರದ ಸುದ್ದಿಯೇ ಇರಲಿಲ್ಲ. ಈಗ ಚಿತ್ರಕ್ಕೆ ಮತ್ತೆ ಚಾಲನೆ ಸಿಕ್ಕಿದ್ದು, ನಾಯಕಿಯ ಆಯ್ಕೆ ಆಗಿದೆ. ನಾಯಕನನ್ನು ಪರಿಚಯಿಸಿದ ಹಾಗೆಯೇ, ನಾಯಕಿಯನ್ನೂ ಒಂದು ವಿಶೇಷವಾದ ವೀಡಿಯೋ ಬಿಡುಗಡೆ ಮಾಡುವ ಮೂಲಕ ಪರಿಚಯಿಸುತ್ತಿದ್ದಾರೆ ಸುನಿ. ವಿಶೇಷ ಏನು ಗೊತ್ತಾ? ಆ ವೀಡಿಯೋವನ್ನು ಆಶಿಕಾ ರಂಗನಾಥ್ ಬಿಡುಗಡೆ ಮಾಡುತ್ತಿದ್ದಾರೆ.
ಹೌದು, ದುಶ್ಯಂತ್ ಅಭಿನಯದ ‘ಗತವೈಭವ’ ಚಿತ್ರಕ್ಕೆ ನಾಯಕಿಯ ಆಯ್ಕೆ ಮುಗಿದಿದೆ. ಆದರೆ, ಆ ನಾಯಕಿ ಯಾರು ಎಂಬುದನ್ನು ಆಶಿಕಾ ರಂಗನಾಥ್ ಹೇಳಲಿದ್ದಾರೆ. ಗುರುವಾರ (ಆಗಸ್ಟ್ 4) ಬೆಳಿಗ್ಗೆ 11 ಗಂಟೆ 11 ನಿಮಿಷಕ್ಕೆ ಸೋಷಿಯಲ್ ಮೀಡಿಯಾದ ಎಲ್ಲ ವೇದಿಕೆಗಳಲ್ಲೂ ಅವರೊಂದು ವೀಡಿಯೋ ಬಿಡುಗಡೆ ಮಾಡಲಿದ್ದಾರೆ. ಈ ವೀಡಿಯೋದಲ್ಲಿ ನಾಯಕಿ ಯಾರು ಎಂದು ಅಧಿಕೃತವಾಗಿ ಘೋಷಿಸಲಿದ್ದಾರೆ. ನಾಯಕಿ ಯಾರಿರಬಹುದು ಎಂಬ ಕುತೂಹಲಕ್ಕೆ ಗುರುವಾರದವರೆಗೂ ಕಾಯಲೇಬೇಕು.
ಅಂದಹಾಗೆ, ‘ಗತವೈಭವ’ ಚಿತ್ರದ ಮೂಲಕ ದುಶ್ಯಂತ್ ಎಂಬ ನವನಾಯಕನನ್ನು ಕನ್ನಡ ಚಿತ್ರರಿಂಗಕ್ಕೆ ಪರಿಚಯಿಸುತ್ತಿದ್ದಾರೆ ಸುನಿ. ಮುಂಚೆ ದುಶ್ಯಂತ್ಗಾಗಿ ‘ರಾಬಿನ್ ಹುಡ್’ ಎಂಬ ಚಿತ್ರವನ್ನು ಅವರು ಘೋಷಿಸಿದ್ದರು. ಈ ಚಿತ್ರವನ್ನು ಪುಷ್ಕರ್ ಮಲ್ಲಿಕಾರ್ಜುನಯ್ಯ ನಿರ್ಮಿಸಬೇಕಿತ್ತು. ಈಗ ಆ ಯೋಜನೆ ಸ್ವಲ್ಪ ಮುಂದಕ್ಕೆ ಹೋಗಿದೆ. ಮೊದಲು ಗತವೈಭವ ಶುರುವಾಗಲಿದ್ದು, ಈ ಚಿತ್ರವನ್ನು ಸುನಿ ಮತ್ತು ದೀಪಕ್ ಜೊತೆಯಾಗಿ ನಿರ್ಮಿಸುತ್ತಿದ್ದಾರೆ.
‘ಗತವೈಭವ’ ಚಿತ್ರಕ್ಕೆ ವಿಕ್ರಾಂತ್ ರೋಣ ಖ್ಯಾತಿಯ ವಿಲಿಯಂ ಡೇವಿಡ್ ಛಾಯಾಗ್ರಾಹಕರಾಗಿ ಕೆಲಸ ಮಾಡುತ್ತಿದ್ದಾರೆ. ಜ್ಯೂಡಾ ಸ್ಯಾಂಡಿ ಸಂಗೀತ ಸಂಯೋಜಿಸುತ್ತಿದ್ದಾರೆ. ಆಶಿಕ್ ಕುಸುಗೋಳಿ ಸಂಕಲನ ಈ ಚಿತ್ರಕ್ಕಿರಲಿದೆ. ಮಿಕ್ಕ ಕಲಾವಿದರು ಮತ್ತು ತಂತ್ರಜ್ಱರ ಆಯ್ಕೆ ನಡೆಯುತ್ತಿದ್ದು, ಸದ್ಯದಲ್ಲೇ ಚಿತ್ರೀಕರಣ ಪ್ರಾರಂಭವಾಗಲಿದೆ.
